सागर डिष्टिलरी सेयर बाँडफाँट: ३ लाख आवेदन, १.१९ लाख पाउने

सागर डिष्टिलरी लिमिटेडको सर्वसाधारणका लागि निष्कासन गरिएको आईपीओ सेयर शुक्रबार बिहान बाँडफाँट हुने भएको छ। बिक्री प्रबन्धक मुक्तिनाथ क्यापिटलले गोलाप्रथाबाट बाँडफाँट प्रक्रिया सम्पन्न गर्ने तयारी गरेको हो।

यो आईपीओमा अन्तिम दिनसम्म २३ लाख ५२ हजार ४९३ जनाले आवेदन दिएका थिए। कुल माग २ करोड ६५ लाख १ हजार १५० कित्ता पुगेको थियो, जसको मूल्य २ अर्ब ६५ करोड रुपैयाँभन्दा बढी हुन्छ। तर, उपलब्ध सेयर सीमित भएकाले १ लाख १९ हजार ६४ जनाले मात्रै १० कित्ताका दरले सेयर हात पार्नेछन्।

यसअघि कम्पनीले वैदेशिक रोजगारीमा रहेका नेपालीहरुका लागि छुट्याएको सेयर बाँडफाँट गरिसकेको थियो। जारी पूँजी ७२ करोड ६० लाख रुपैयाँको २० प्रतिशतबराबर १४ लाख ५२ हजार कित्ता आईपीओ निष्कासन गरिएको थियो।

यसमा १० प्रतिशत (१ लाख ४५ हजार २०० कित्ता) वैदेशिक रोजगारमा रहेका नेपालीहरुका लागि, ५ प्रतिशत (७२ हजार ६०० कित्ता) सामूहिक लगानी कोषका लागि र ४३ हजार ५६० कित्ता कर्मचारीहरुका लागि सुरक्षित गरिएको थियो। सर्वसाधारण लगानीकर्ताका लागि भने कुल ११ लाख ९० हजार ६४० कित्ता सेयर निष्कासन गरिएको हो।