PPL पिपुल्स पावरको अवितरित हकप्रद शेयर लिलामीमार्फत बिक्री हुने

PPL पिपुल्स पावर लिमिटेडले आफ्नो अवितरित हकप्रद शेयर लिलामी प्रक्रियामार्फत बिक्रीमा ल्याउने भएको छ। कम्पनीले गत असार २२ गतेदेखि साउन २६ गतेसम्म १ः०.५० (१० कित्ताबापत ५ कित्ता) का दरले कुल ३१ लाख ६३ हजार कित्ता हकप्रद शेयर निष्कासन गरेको थियो। यसमा असार १ गतेसम्म नेप्सेमा कायम रहेका शेयरधनीले आवेदन दिन पाएका थिए।

उक्त निष्कासन अवधिभरमा ९१ हजार ९३८ जना शेयरधनीलाई २७ लाख ७१ हजार २११ कित्ता हकप्रद शेयर बाँडफाँट भइसकेको छ। बाँकी रहेका ३ लाख ९१ हजार ७७९ कित्ता शेयर भने लिलामी बढाबढमार्फत भदौ १५ गतेदेखि २२ गतेसम्म बिक्रीमा आउने भएको हो।

लिलामीमा सहभागिता जनाउन इच्छुकले प्रतिकित्ता न्यूनतम १०० रुपैयाँ अंकित मूल्य तोकिएको शेयर खरिदका लागि आवेदन दिन सक्नेछन्। आवेदन दिन कम्तीमा १०० कित्ता र बढीमा सम्पूर्ण कित्ता माग गर्न सकिने व्यवस्था गरिएको छ।

यसका लागि इच्छुक जोकोही सर्वसाधारण, संस्थापक वा संघ–संस्थाले बोलपत्र पेश गर्नुपर्नेछ। बोलपत्र फाराम बिक्री प्रबन्धक प्रभु क्यापिटल लिमिटेड, कमलादी, काठमाडौंबाट साथै प्रभु बैंकका विराटनगर, वीरगंज, हेटौंडा, पोखरा, बुटवल, सुर्खेत र धनगढी शाखा कार्यालयहरूबाट प्राप्त गर्न सकिनेछ। फाराम सोही स्थानमा बुझाउनुपर्नेछ।