राजस्वमा उछाल देखाए पनि नेपाल वेयरहाउसिङ ५५.८८ करोड घाटामा
Author
NEPSE TRADING
नेपाल वेयरहाउसिङ कम्पनी लिमिटेडले आर्थिक वर्ष २०८१/८२ को चौथो त्रैमाससम्मको असार मसान्त (३२ असार २०८२) मा समाप्त हुने वित्तीय विवरण सार्वजनिक गरेको छ। राजस्वमा उल्लेखनीय वृद्धि भए पनि कम्पनी अझै घाटामै सीमित भएको छ।
प्रकाशित विवरण अनुसार, कम्पनीले ३१ करोड ३७ लाख रुपैयाँ राजस्व आर्जन गरेको छ, जुन अघिल्लो वर्षको सोही अवधिको १२ लाख ९१ हजार रुपैयाँ भन्दा धेरै गुना बढी हो। अन्य आम्दानीसहित कम्पनीको कुल आम्दानी ३१ करोड ४० लाख रुपैयाँ पुगेको छ।
तर, कम्पनीले सञ्चालन खर्चमा २९ करोड ८१ लाख रुपैयाँ, कर्मचारी लाभमा १ करोड ३७ लाख रुपैयाँ, र वित्तीय खर्चमा ४ करोड ३६ लाख रुपैयाँ व्यय गरेको छ। यसकै कारण चालु वर्ष कम्पनीले ५५ करोड ८८ लाख रुपैयाँ खुद घाटा व्यहोर्नुपरेको हो। अघिल्लो वर्ष यो घाटा ५८ करोड ५७ लाख रुपैयाँ रहेको थियो।
आर्थिक स्थितिको दृष्टिले, कम्पनीको कुल सम्पत्ति १ अर्ब ७१ करोड रुपैयाँ पुगेको छ, जुन अघिल्लो वर्षको १ अर्ब ६३ करोड रुपैयाँ भन्दा बढी हो। तर, स्वामित्व पूँजी ५१ करोड ८८ लाख रुपैयाँमा घटेको छ, जुन अघिल्लो वर्ष ५६ करोड ३३ लाख रुपैयाँ थियो। कम्पनीमा अझै ठूलो ऋण बोझ छ, जसअन्तर्गत ९९ करोड ४२ लाख रुपैयाँ ऋण रहेको छ।
कम्पनीको प्रति शेयर आम्दानी (EPS) ऋणात्मक ८ रुपैयाँ १३ पैसा रहेको छ भने प्रति शेयर नेटवर्थ ७४ रुपैयाँ २८ पैसा कायम भएको छ। कम्पनीको ग्रस प्रफिट मर्जिन ८.२६% मा खस्किएको छ।
समग्रमा, नेपाल वेयरहाउसिङले राजस्वमा बलियो वृद्धिदेखाएको भए पनि नाफा बनाउन अझै चुनौतीपूर्ण छ। उच्च खर्च र ऋणका कारण कम्पनीको नाफामार्जिन दबाबमा रहेको छ, जसले गर्दा आगामी वर्षमा नाफामा फर्कन सक्ने कि नसक्ने भन्ने प्रश्न लगानीकर्ताको प्रमुख चासो हुनेछ।
