सरकारले झण्डै २० अर्ब आन्तरिक ऋण उठाउने

नेपाल सरकारले झण्डै २० अर्ब रुपैयाँ बराबरको आन्तरिक ऋण उठाउने भएको छ। सार्वजनिक ऋण व्यवस्थापन कार्यालयका अनुसार सोमबार ट्रेजरी बिलको बोलकबोलमार्फत कुल १९ अर्ब ८५ करोड ५० लाख रुपैयाँ बराबरको ऋण संकलन गर्न लागिएको हो।

यस अन्तर्गत ५ अर्ब रुपैयाँको नयाँ ट्रेजरी बिल जारी हुने र १४ अर्ब ८५ करोड ५० लाख रुपैयाँ बराबरको नवीकरण गरिनेछ। यी ऋणपत्रहरू १८२ दिन र ३६४ दिन अवधिका हुने जनाइएको छ। बोलकबोल सोमबार दिउँसो २ बजेसम्म खुला रहनेछ भने मंगलबार ट्रेजरी बिल जारी गरिनेछ।

हाल बैंक तथा वित्तीय संस्थाहरूमा पर्याप्त तरलता भएकाले ट्रेजरी बिल खरिदमा उच्च प्रतिस्पर्धा देखिएको छ। मागभन्दा धेरै आवेदन पर्ने भएकाले डिस्काउन्ट रेट २.७५ प्रतिशतभन्दा तल झरेको छ। पछिल्लो बोलकबोलमा ९१ दिने ट्रेजरी बिलको औसत ब्याजदर २.३६ प्रतिशत र १८२ दिने बिलको १.६१ प्रतिशत निर्धारण भएको थियो।

बैंकहरूबीच बढ्दो प्रतिस्पर्धाका कारण ट्रेजरी बिलको ब्याजदर क्रमशः घट्दै गएको छ। हाल जारी बिलहरूको खरिदका लागि झण्डै ७ गुणा बढी माग परेको पनि सार्वजनिक ऋण व्यवस्थापन कार्यालयले जनाएको छ।

विशेषज्ञहरूका अनुसार अन्य क्षेत्रमा लगानी विस्तार हुन नसक्दा बैंकहरूले सरकारी ऋणपत्रहरूमा लगानी गरेर अल्पकालीन आम्दानी खोजिरहेका छन्, जसका कारण बजारमा अल्पकालीन ब्याजदर पनि घट्दै गएको देखिएको छ।

ट्रेजरी बिल सरकारद्वारा एक वर्ष वा त्यसभन्दा कम अवधिको आन्तरिक ऋणका लागि जारी गरिने अल्पकालीन ऋणपत्र हो। यसका चार प्रकार — २८ दिने, ९१ दिने, १८२ दिने र ३६४ दिने — रहेका छन्।