बिटक्वाइनको मूल्य कीर्तिमानी उचाइमा — अमेरिकी नीतिले बजारमा सकारात्मक असर

काठमाडौं । विश्वकै सबैभन्दा ठूलो क्रिप्टोकरेन्सी बिटक्वाइनले नयाँ कीर्तिमान कायम गरेको छ। आइतबार अमेरिकी बजारमा यसको मूल्य झण्डै २.७ प्रतिशतले बढ्दै १ लाख २५ हजार २४५.५७ अमेरिकी डलर पुगेको छ, जुन हालसम्मकै उच्चतम स्तर हो।

बिटक्वाइनको मूल्यवृद्धिमा अमेरिकी राष्ट्रपति डोनाल्ड ट्रम्प प्रशासनको क्रिप्टो–मैत्री नीति र संस्थागत लगानीकर्ताहरूको उच्च माग मुख्य कारणका रूपमा देखिएको छ। अगस्ट महिनाको मध्यतिर पनि बिटक्वाइन १ लाख २४ हजार ४८० डलरसम्म पुगेको थियो, जसपछि बजारमा पुनः उत्साह देखिएको हो।

सन् २००९ मा सातोशी नाकामोतोले बिटक्वाइनको सिर्जना गर्दा यसको मूल्य लगभग शून्यको आसपास थियो। पहिलो पटक सन् २०१० को अक्टोबरमा यसको मूल्यमा उल्लेखनीय वृद्धि भएको थियो — ०.१० डलरबाट बढ्दै ०.३० डलरसम्म पुगेको थियो। त्यसपछि सन् २०१३ सम्ममा बिटक्वाइनको मूल्य १ हजार डलर नाघिसकेको थियो।

हालका वर्षहरूमा राष्ट्रपति ट्रम्पले क्रिप्टो कम्पनीहरूसँग काम गर्ने बैंकहरूमा लगाइएका प्रतिबन्ध हटाउने लगायतका निर्णय गरेका छन्, जसले क्रिप्टो बजारमा सकारात्मक प्रभाव पारेको विश्लेषण गरिएको छ।

त्यस्तै, ठूला संस्थागत लगानीकर्ताहरूले बिटक्वाइन ईटीएफमा अर्बौं डलर लगानी गरेपछि माग बढेको छ। साथै लन्डन र थाइल्याण्ड जस्ता बजारहरूले क्रिप्टो ईटीएफलाई स्वीकृति दिएपछि विश्वभर क्रिप्टो बजारमा थप विश्वास जगिएको छ।

बजार विश्लेषकहरूका अनुसार, संस्थागत लगानी, सरकारी समर्थन र अन्तर्राष्ट्रिय स्वीकृतिले बिटक्वाइनको मूल्यमा नयाँ उचाइ ल्याएको हो। यससँगै क्रिप्टो बजारमा फेरि एकपटक विश्वव्यापी उत्साह र लगानीको लहर देखा परेको छ।