नेप्से २१ अंकले उकालो, कारोबार रकममा गिरावट

यस दिन नेप्से परिसूचक २१.६२ अंकले बढेर २६३८.६० विन्दुमा पुगेको छ। सेन्सेटिभ इण्डेक्स २.३१ अंक, फ्लोट इण्डेक्स १.४० अंक र सेन्सेटिभ फ्लोट इण्डेक्स ०.९० अंकले वृद्धि भएको छ। यसले समग्र बजारमा सकारात्मक माहोल देखाएको छ।

यद्यपि, परिसूचक बढे पनि कारोबार रकम भने घटेको छ। सोमबार ५ अर्ब १३ करोड रुपैयाँ बराबरको कारोबार भएको बजारमा यस दिन ३२८ कम्पनीका ४९ हजार ९३ पटकको कारोबारमार्फत ४ अर्ब २३ करोड २४ लाख रुपैयाँ बराबरको ९३ लाख ६४ हजार कित्ता शेयर किनबेच भएको छ।

यस दिन सालपा विकास बैंकको शेयर पुनः सकारात्मक सर्किट लेभलमा कारोबार भएको छ। बैंकको शेयरमूल्य ४३ रुपैयाँ ९० पैसाले बढेर ४८३ रुपैयाँ १० पैसामा पुगेको छ। त्यस्तै, रिलायन्स स्पिनिङ्ग मिल्स र हिमालयन पावर पार्टनरको शेयरमूल्य ९ प्रतिशतभन्दा बढीले बढेको छ भने सागर डिष्टिलरीको शेयरमूल्य करिब ९ प्रतिशतले वृद्धि भएको छ। घटेका कम्पनीहरूको मूल्य गिरावट दर ४ प्रतिशतभन्दा कम रहेको छ।

कारोबार रकमका आधारमा एसवाई प्यानल नेपाल शीर्ष स्थानमा रहेको छ। कम्पनीको ३७ करोड ७२ लाख रुपैयाँ बराबरको शेयर कारोबार भएको छ। त्यस्तै, आँखु खोला जलविद्युत कम्पनीको २४ करोड रुपैयाँभन्दा बढी र राधी विद्युत कम्पनीको १६ करोड रुपैयाँभन्दा बढीको कारोबार भएको छ।

यस दिन १३ वटै उपसमूहको परिसूचक बढेको छ। होटल तथा पर्यटन उपसमूह सर्वाधिक २.०२ प्रतिशतले बढेको छ भने विकास बैंक, जलविद्युत, उत्पादन तथा प्रशोधन र व्यापार उपसमूहको परिसूचक पनि १ प्रतिशतभन्दा बढीले वृद्धि भएको छ।